«Білім мазмұнын жаңарту аясында оқушылардың оқу жетістігін критериалды бағалау» тақырыбында аудандық информатика пәні мұғалімдеріне арналған оқыту семинары өтті.
Шу ауданы әкімдігі білім бөлімінің әдістемелік кабинетінің ұйымдастыруымен 2017 жылдың 21 қазанында «Білім мазмұнын жаңарту аясында оқушылардың оқу жетістігін критериалды бағалау» тақырыбында аудандық оқыту семинары өтті. Семинар жұмысына аудандық информатика пәні мұғалімдері қатысты.
2017-2018 оқу жылында жаңа бағдарлама бойынша оқушылардың үлгерімі алдын-ала белгіленген критерийлердің жиынтығымен өлшенеді.
Мұнда оқушылардың пән бойынша оқу жетістіктері екі тәсілмен–қалыптастырушы және жиынтық бағалау арқылы жүзеге асырылады. Қалыптастырушы бағалау күнделікті оқу мен оқыту үрдісінде тоқсан бойына жүргізіле отырып, мұғаліммен оқушы арасындағы кері байланысты қамтамасыз етеді. Сондай-ақ ата-аналарға баласының оқу жетістіктері туралы ақпарат беру үшін қолданылады. Жиынтық бағалау бөлімдер немесе ортақ тақырыптар және тоқсан аяқталған кезде қолданылады.
Мұғалімдер оқушының білім жетістігін дәл бағалау үшін тоқсандық жиынтық бағалау қорытындысын модерациялайды. Қажет жағдайда тоқсандықжиынтық бағалау нәтижесі көтеріледінемесе төмендетіледі. Критериалды бағалау оқушылардың жетістіктерін бір-бірімен салыстырмайды және бір-біріне тәуелді етпейді. Ол әр оқушының құзыреттілік деңгейі туралы ақпарат беруге бағытталады.
Семинардың бағдарламасына сәйкес аудандық әдістемелік кабинеттің пән әдіскері Татибеков Дархан Рахимбердиевич критериалды бағалаудың ерекшеліктері бойынша таныстырылым жасады. Семинарға қатысушыларғакритериалды бағалауды жоспарлап, өткізуде басшылыққа алынатын нормативтік-әдістемелік құжаттар тізімі ұсынылды. Қалыптастырушы және жиынтық бағалауды ұйымдастыруға, оқушы портфолиосын жинақтау және электронды журналға балл мен баға қою үдерісі және модерацияны өткізуге бағытталған әдістемелік кеңестер ұсынылды. Тоқсандық жиынтық бағалауды өткізу (спецификация, баға қою механизмі), нәтижелерді талдау, модерация үдерісін тиімді өткізу мақсатында оқу жылына жоспар жасау бойынша түсіндірме жұмыстары жүргізілді.
Сондай – ақ М.Мақатаев атындағы орта мектебінің информатика пәні мұғалімі Ким Татьяна Геннадьевна орыс тілінде сабақ беретін мұғалімдерге бөлім бойынша жиынтық бағалауды өткізу, білім алушылардың портфолиосын жинақтауға бағытталған тренинг өткізді. Ата-аналарға баласының оқу жетістіктері туралы ақпарат беруде рубриканың толтырылуы бойынша талқылау жұмысы жүргізілді. Семинарға қатысушылар жаңа бағалау жүйесі бойынша пікірлерімен бөлісіп, сұрақтарына жауап алды.
Б.Момышұлы орта мектебінің информатика пәні мұғалімі Дуанбаева Наркес қазақ тілінде сабақ беретін мұғалімдерге бөлім бойынша жиынтық бағалауды өткізу, білім алушылардың портфолиосын жинақтауға бағытталған тренинг өткізді. Ата-аналарға баласының оқу жетістіктері туралы ақпарат беруде рубриканың толтырылуы бойынша талқылау жұмысы жүргізілді. Семинарға қатысушылар жаңа бағалау жүйесі бойынша пікірлерімен бөлісіп, сұрақтарына жауап алды.
Семинар соңында «Кері байланыс» парақтары таратылып, қатысушылардың пікірі тыңдалды. Қатысушылардың идеялары мен пікірлері ескеріле отырылып, оқыту семинарыныңшешімі оқылды.
1.5, 7-сыныптарда білім беру үрдісін ұйымдастыруда ҚР Үкіметінің 2016 жылғы 13 мамырдағы № 292 қаулысымен бекітілген Негізгі орта білім берудің мемлекеттік жалпыға міндетті стандарты, Қазақстан Республикасы Білім және ғылым министрінің 2016 жылғы 23 қарашадағы №668 бұйрығымен бекітілген жалпы білім беретін пәндердің үлгілік оқу бағдарламалары, «Білім беру ұйымдарында пайдалануға рұқсат етілген оқулықтардың, оқу-әдістемелік кешендердің, оқу құралдарының және басқа да қосымша әдебиеттердің, оның ішінде электрондық жеткізгіштердегі тізбесін бекіту туралы» ҚР Білім және ғылым министрі міндетін атқарушының 2013 жылғы 27 қыркүйектегі № 400 бұйрығына өзгерістер мен толықтырулар енгізу туралы» ҚР Білім және ғылым министрінің 2017 жылғы 4 сәуірдегі №150 бұйрығымен бекітілген оқу басылымдары басшылыққа алынсын.
2.2017-2018 оқу жылында Қазақстан Республикасының жалпы орта білім беретін ұйымдарында оқу процесін ұйымдастырудың ерекшеліктері туралы Әдістемелік нұсқау хат басшылыққа алынып, барлық пән бірлестігі отырысында талқылансын.
3.5, 7 сыныптардағы оқу үрдісін ұйымдастыруда Қазақстан Республикасының Білім және ғылым министрінің 2016 жылғы 23-қарашада №668 бұйрығымен бекітілгенбағдарламасындағы талаптардың ерекшелігіне назар аударылсын.
4.Білім мазмұнын жаңарту аясында оқушылардың оқу жетістігін критериалды бағалау жүйесіне көшуде «Назарбаев зияткерлік мектептері» дербес білім беру ұйымының іс-тәжірибесі басшылыққа алынсын.
5. Тоқсандық жиынтық бағалауды өткізу(спецификация, баға қою механизмі), нәтижелерді талдау, модерация үдерісін тиімді өткізу мақсатында мектептердегі әдістемелік бірлестіктерде мектеп үйлестірушілермен бірлесе отырып оқу жылына жоспар жасалып, жүзеге асырылсын.
6. Оқушы портфолиосын жинақтау және электронды журналға балл мен баға қою үдерісі нақты мерзімінде жасалынсын.
7. Мұғалімдердің кәсіби біліктілігін арттыру мақсатында пән мұғалімдерімен оқыту семинарлары өткізіліп, «Тәжірибедегі рефлексия» курсы ұйымдастырылсын.
8. Оқушылардың ата-аналарымен бағалаудың жаңа жүйесінің негізгі принциптерін түсіндіру мақсатында практикалық тренинг, шеберлік сыныптары өткізілсін.
9. Критериалды бағалауды ұйымдастырып өткізуде әдістемелік көмек көрсету мақсатында пән мұғалімдерінің желілік қауымдастығының жұмысы жандандырылсын.
10.Пән мұғалімдерінің оқушылардың оқу жетістігін критериалды бағалау арқылы білім мазмұнын жаңартуда жеткен нәтижелері баспа беттерінде жариялап отыру қолға алынсын.
